தங்க மணம்

தங்க வில்லை கொண்டவர்க்கு

தங்க மணம் தங்கவில்லை!

தங்க மணம் கொண்டவர்க்கு

தங்க வில்லை தங்கவில்லை!!

நீதியிலாச் சொல்

தங்களுக்கு வாய் இருப்பதாலும், அதிகாரம் இருப்பதாலும் நீங்கள் உத்தரவிட்டே ஆக வேண்டும்..

எனக்குக் காதுகள் இருப்பதாலும், தங்களின் சார்நிலைப் பணியாளராக இருப்பதாலும் நீங்கள் சொல்வதை நான் கேட்டே ஆக வேண்டும்..

ஆனாலும்

எனக்கு மூளையும் இருப்பதாலும், அதில் சொந்த சிந்தனையும் இருப்பதாலும், என்னை வழிநடத்த எனக்கென்று கொள்கையும் இருப்பதாலும், 

அக் கொள்கையே என்னை வழி நடத்தும்...

சொல்லற்க, சொல்லில் நீதியிலாச் சொல்

தமிழ்ச் சோகை

தமிழைப் படிக்க எழுத பேச தெரிந்திருந்தும்

தமிழ்ப் பாடப் புத்தகத்தைத் தாண்டி

தமிழில் அறிவியலையும் வரலாறையும் சமூகத்தையும் 

படித்தறியும் வாகற்ற ஒரு தலைமுறை உருவாகி கண்முன்னே நிற்கிறது.

காலந்தோறும் வரும் கருவிகள் தோறும் ஏறியதால் 

வாழ்வாங்கு வாழ்ந்து கொண்டிருக்கும் ஒரு மொழிக்கு ஏற்பட்டிருக்கும் 

ஆகப் பெரும் சோகம் எதுவெனில்

இளைய உதிரத்தில் ஏற்பட்டுள்ள 

தமிழ்ச் சோகை

சமத்துவ வாய்ப்பாடு

உலக மகளிர் தினத்தை வெறுமனே மகளிர் தினமாகக் கொண்டாடாமல் உலக உழைக்கும் மகளிர் தினமாக கொண்டாடுகிறோம்.

உழைக்காமல் குடும்பத்தையே சுரண்டி, குடித்துக் கூத்தடித்து, குடும்பத்தை அண்டி வாழும் ஆண்கள் வேண்டுமானால் உண்டு. உழைக்காத பெண் ஒருவர் உலகில் இல்லை.

வேலைக்குப் போகும் பெண்கள் அனைவரும் பணியிடங்களில் தங்கள் உழைப்பைச் செலுத்துவது மட்டும் அல்லாமல் பணி முடித்து வீட்டுக்கு வந்த பின்பு வீட்டில் இருக்கும் பணிகளையும் கவனித்து *இரட்டை உழைப்பை* ஒவ்வொரு நாளும் செலுத்தி வருகின்றனர்.

குடும்பங்களைப் பராமரித்து வரும் பல பெண்களை நீங்கள் என்ன செய்கிறீர்கள்? என்று கேட்டால் "நான் எந்த வேலைக்கும் செல்வதில்லை. வீட்டில் சும்மாதான் இருக்கிறேன்" என்று சாதாரணமாகக் கூறுவார்கள்.

உழைக்கும் மகளிர் என்பதில் உள்ள 'உழைக்கும்' என்ற சொல்லை, 'பொருளாதார ரீதியாக பணம் ஈட்டும்' என்று மட்டுமே பொருள் கொள்ளக்கூடாது.

ஏனென்றால் குடும்பத்தில் உள்ள அனைவரின் உற்பத்தித் திறனுக்கும் உந்து விசை அளிக்கும் பெண்ணின் உழைப்புக்கு ஊதியம் கணக்கிட்டால்தான், வீட்டில் இருக்கும் பெண்களின் உழைப்பின் மதிப்பு எவ்வளவு என்று தெரியும்.

ஸ்டேட் பாங்க் ஆஃப் இந்தியாவின் சமீபத்திய அறிக்கையில், "வீட்டு வேலைகளைச் செய்யும் அனைத்து பெண்களுக்கும் அவர்களின் வேலைக்கான ஊதியம் வழங்கப்பட்டால், அவர்களுக்கு வழங்கப்படும் ஊதியத்தின் மொத்தத் தொகை இந்தியாவின் ஜிடிபி எனப்படும் ஒட்டுமொத்த உள்நாட்டு உற்பத்தியில் 7.5 விழுக்காட்டுக்கு நிகராக இருக்கும்" என்கிறது.

"15 முதல் 60 வயது வரை உள்ள இந்தியப் பெண்கள் தங்கள் தினசரி நேரத்தில் சுமார் 7.2 மணி நேரத்தை வீட்டு வேலையில் செலவிடுகிறார்கள் என்பதால் பெண்களுக்கு ஓய்வெடுக்கக் கூட நேரம் கிடைக்காத “நேர வறுமை” இருக்கிறது" என்று ஐஐஎம்ஏ பேராசிரியர் நம்ரதா சிந்தார்கர் கூறுகிறார்.

பெண்களுக்கான இந்த நேர வறுமையைப் போக்க வீட்டு வேலைகள் பலவும் சமூக வேலைகளாக மடை மாற்றம் செய்யப்பட வேண்டும். குறிப்பாக சோஷியல் கிட்சன் என்று சொல்லப்படும் ஆரோக்கியமான சத்தான சமூக உணவு தயாரிப்பு முறையை நடைமுறைக்குக் கொண்டு வர வேண்டும். அது சாத்தியமாக முதலில் வீட்டில் உள்ள வேலைகள் அனைத்தும் வீட்டில் உள்ள ஆண், பெண் நபர்கள் அனைவருக்கும், அவரவர்களின் வயது மற்றும் சக்திக்கேற்ப சமமாகப் பகிர்ந்து அளிக்கப்பட வேண்டும்.

குறிப்பாக குழந்தை வளர்ப்பில் பாலினப் பாகுபாட்டை அறவே ஒழிக்கும் வகையில், வீட்டைப் பெருக்குவது, துடைப்பது, சுத்தமாகப் பராமரிப்பது, துணி துவைப்பது, பாத்திரம் துலக்குவது போன்ற அன்றாட அடிப்படைப் பணிகளை ஆண், பெண் குழந்தைகளுக்கு மாற்றி மாற்றி அளித்து பயிற்றுவிக்கப்பட வேண்டும். இவையெல்லாம் பெண்களின் வேலைகள் என்கிற பிற்போக்குச் சிந்தனையை ஆண் குழந்தைகளின் மூளைகளில் இருந்து முற்றிலும் அகற்றப்பட வேண்டும்.

பெண்ணை ஆணுக்கு அடிமை என்று சொல்லி பேதப்படுத்தும் புராண, இதிகாசக் கசடுகள் குழந்தைகளிடம் சேராமல் தடுக்கப்பட வேண்டும். சமத்துவமின்மை எனும் பிற்போக்குத்தனத்தைப் பயிற்றுவிக்கும், நியாயப்படுத்தும் எதுவும் சமூக முன்னேற்றத்திற்கான தடைக்கற்களே என்பதை நமது அடுத்த தலைமுறைக்குப் புரிய வைப்போம். தடைகளை உண்டாக்கும் தாடைகள் பெண்களின் கைகளால் நாளை உடைபடும்.

அரசியல் சமத்துவத்துக்கான வாய்ப்பாடு சமூக சமத்துவத்தில் அடங்கியிருக்கிறது. சமூக சமத்துவத்துக்கான வாய்ப்பாடு பாலின சமத்துவத்தில் அடங்கியிருக்கிறது. பாலின சமத்துவத்துக்கான வாய்ப்பாடு வீட்டில் உள்ள குழந்தைகளை சமத்துவமாக வளர்ப்பதில் அடங்கியிருக்கிறது. ஆகவெ நாம் அனைவரும் "ஆணும் பெண்ணும் ஒன்னு - அதை மறுப்பவர் தலையில மண்ணு" எனும் சமத்துவ வாய்ப்பாட்டைப் பயில்வோம். அனைவரும் மகிழ்வோம்.

உழைக்காத மகளிர் உலகில் இல்லை!

மகளிர் உழைக்காமல் உலகே இல்லை!!

உழைப்பே உருவான மகளிர் அனைவருக்கும்

உலக உழைக்கும் மகளிர் தின வாழ்த்துக்கள்

-மாணிக்க முனிராஜ்

ஆய்வுச் சூடி

அறிவியல் மனம் கொள்

ஆராய்ந்து தினம் வெல்

இருத்தல் ஒன்றே மெய்

ஈசன்நீ யல்லால் பொய்

உருட்டு இதுவென உணர்

ஊர்தோறும் பொய்களைத் தகர்

எதையும் வினவத் துணி

ஏனெனக் கேட்பதே அணி

ஐயம் அறுத்து சொல்க

ஒன்றே மனிதம் வெல்க

ஓங்கி முழங்கி வருக

ஒளவில் பொதுமை தருக

- மாணிக்க முனிராஜ்

வேற்றுமையா? பாகுபாடா?

வேற்றுமையா? பாகுபாடா?

மாற்றுத்திறனாளிகளுக்கு மதிப்பளிக்கும் வகையில் கொண்டாடப்படும் சிறப்பு தினங்களை ஒட்டி தயாரிக்கப்பட்டுள்ள ஒரு துண்டு பிரசுரத்தில் ”வேற்றுமையை ஒழிப்போம்” என்று சொல்லாடல் கையாளப்பட்டிருந்தது. இது முற்றிலும் தவறான சொல்லாடல்.

வேற்றுமை என்பது இயற்கையில் ஒன்றுக்கொன்று வேறுபட்டிருப்பது. ஆண் - பெண், பள்ளம் - மேடு, நீர் - நெருப்பு, செடி - மரம் என்றவாறு பலவகையாக வேற்றுமைகள் உண்டு. இவையனைத்தும் இயற்கையானவை இயல்பானவை.

பாகுபாடு என்பது செயற்கையில் ஒன்றை உருவாக்கி, தான் வாழ பிறரைச் சுரண்டுவது. மேல் கீழான எண்ணத்துடன் பிறரை மதிப்பது, நடத்துவது, பின்பற்றுவது.

நீங்கள் வெள்ளை நான் கருப்பு என்பது வேற்றுமை,
வெள்ளை அழகு, கருப்பு அசிங்கம் என்பது பாகுபாடு.

நீங்கள் உயரம் நான் குட்டை என்பது வேற்றுமை,
உயரம் பெருமை, குட்டை சிறுமை என்பது பாகுபாடு.

நீங்கள் கிராமம் நான் நகரம் என்பது வேற்றுமை,
கிராமத்தான் நாகரிகம் குறைவானவனாகவும், நகரத்தான் மேட்டிமை மிக்கவனாகவும் கருதுவது பாகுபாடு.

இன்னும் ஆம்பள-பொட்டச்சி என்பதும், மேல்சாதி- கீழ்சாதி என்பதும், பலசாலி-நோஞ்சான் என்பதும் பாகுபாடு.

மாற்றுத்திறனாளிகளை நொண்டி, குருடு, செவிடு, ஊமை என்பதும், மாற்றுப்பாலினத்தவரை ஒம்பது, அலி, அது என்பதும் பாகுபாட்டுச் சொற்கள்.

இவ்வாறான பாகுபாட்டுச் சொற்களை எந்தவித சமூக அக்கறையும் இன்றி பயன்படுத்துவதும், அவ்வாறான பாகுபாட்டு மனநிலையில் உழல்வதும், பிறரைப் பாகுபடுத்திப் பேசுவதை, பழகுவதை தன்னுடைய அன்றாட நடத்தையில் வைத்துக் கொண்டு வாழ்வதும் முற்றிலும் தவறானது. அறநெறிக்கு மாறானது.

ஆகவே நாம் ஒழிக்க வேண்டியது பாகுபாட்டை மட்டுமே. வேற்றுமையை அல்ல. மாறாக வேற்றுமைகளைப் போற்ற வேண்டும். ஒழிக்கக் கூடாது.

"வேற்றுமையில் ஒற்றுமை காண்போம்" ("Unity in Diversity") எனும் சொற்றொடரை நினைவில் கொண்டுவர வேண்டிய அதே வேளையில், ”பாகுபாடு ஒரு பாவச் செயல்” (”Discrimination is a Sin") என்ற பதத்தையும் நம் மனதில் ஆழப் பதிவு செய்வோம்.

பாகுபாட்டை ஒழிப்போம்.
பாகுபாட்டை வேரறுப்போம்.
பாகுபாடற்ற சமூகம் படைப்போம்.

- மாணிக்க முனிராஜ்

பிறந்தநாள் வாழ்த்து

 

என் அன்பு மக்கா...

பிறந்தநாள் வாழ்த்து

🌹🌹🌹❤️🌹🌹🌹

உறவுகளோடு 

உன்னை இணைத்துக்கொள்

உண்மைகளோடு

உன்னைப்

பிணைத்துக்கொள்

புத்தகங்களோடு

உன்னைப்

புதைத்துக்கொள்

மகிழ்ச்சியான வாழ்வில்

உன்னை

விதைத்துக்கொள்

அதற்கு முதலில்

மூடநம்பிக்கைகளை உன்னிலிருந்து 

சிதைத்துக் கொல்.

எதையும் கேள்வி கேள்

எதற்கும் பதில் தேடு

கல்வியைக் காதலி

காதலைக் கற்றுக்கொள்.

வெள்ளையாக இருப்பதும்

வசதியாக இருப்பதும்

அல்ல 

அழகு

உண்மையாக இருப்பதும்

உழைத்துப் பிழைப்பதும் தான்

அழகு.

பிறரிடம் நீ ஏற்றுக்கொள்வதையே

பிறருக்காக நீயும் செய்

எல்லாரோடும் மகிழ்ந்து சிரி

உண்மை 

இல்லாரோடு இகழ்ந்து பிரி

உன்னால் தெளிவாக விளக்க முடியாததை -

நீ இன்னும் புரிந்து

கற்றுக் கொள்ளவில்லை

உன்னால் திடமாக சாதிக்க முடியாததை -

நீ இன்னும் முறையாகப் 

பயிலவில்லை.

எல்லாவற்றையும் -

ஐயத்தில் தொடங்கு

அறிவில் பயணி

விவாதித்துப் பழகு

உத்தேசமாகச் சிந்தி

ஆலோசித்து முடிவெடு

அன்பில் முடித்திடு.

அறிவியலோடு ஒட்டாத எதையும் ஏற்றுக்கொள்ள 

மறு

அது அன்பின்பாற்பட்டதாக இருந்தால் மட்டும் கொஞ்சம்

பொறு

அன்பையும் அறிவியலையும் 

இரு கண்களாகக் கொண்டு

இரு.

❤️❤️❤️🌹❤️❤️❤️

என்றென்றைக்குமான எனது 

அடுத்த தலைமுறைக்கான 

பிறந்தநாள் வாழ்த்து செய்தி இது