அறுபடாத தொடர் சங்கிலி

மாற்றத்தின் மணற்கேணியில்

தொட்டனைத்து ஊறிப் பரவிய

உலகின் பல படைப்புகளை

உளமாற நுகர்வது 

வாசிப்பு

வாசிப்பின் பகிர்மாணத்தில்

உழைப்பின் துளிகளில் 

வலிகளின் உதிரத்தில்

விதிர்க்கும் முத்துக்கள்

சிந்தனை

சிந்தனையின் ஆற்றலில்

செந்தண்மை ஊற்றில்

புனைவின் மிடுக்கில்

பிறக்கும் ஆக்கங்கள்

படைப்பு

படைப்பின் சாரத்தில்

கற்றலின் ஒருங்கிணைப்பில்

சமூகப் புரட்சிக்கான

செயலூக்கத்தின் சாதனைகள்

மாற்றம்

மாற்றம்  - வாசிப்பு 

வாசிப்பு - சிந்தனை 

சிந்தனை - படைப்பு 

படைப்பு - மாற்றம் 

என்பதே சமூக ஒழுங்கின்

அறுபடாத தொடர் சங்கிலி

அடிமை எதுவரை

 அடிமைப்பட்டுக் கிடக்கிறவர்

அடிமைப்பட்டுக் கிடக்கும் வரை

அடிமைப்படுத்துபவர்

அடிமைப்படுத்துவர்

பண் பாடு

பயணங்கள் தான் மனிதனைப்

பக்குவப்படுத்துகிறது. 

பக்குவங்கள் தான் மனிதனைப்

பண்படுத்துகின்றன. 

பண்பாடு தான் மனிதனைப் 

பண் பாடவும் வைக்கிறது.

உயிர்

எண்ணும் எழுத்தும்

கண்ணென மட்டுமே தகும்

அன்பும் அறிவியலும்

உயிரெனத் தகும்

🌹🌹🌹

உள்ளதை நேசி

அல்லதையே யோசிக்காதே

உள்ளதை நேசி

தங்க மணம்

தங்க வில்லை கொண்டவர்க்கு

தங்க மணம் தங்கவில்லை!

தங்க மணம் கொண்டவர்க்கு

தங்க வில்லை தங்கவில்லை!!

நீதியிலாச் சொல்

தங்களுக்கு வாய் இருப்பதாலும், அதிகாரம் இருப்பதாலும் நீங்கள் உத்தரவிட்டே ஆக வேண்டும்..

எனக்குக் காதுகள் இருப்பதாலும், தங்களின் சார்நிலைப் பணியாளராக இருப்பதாலும் நீங்கள் சொல்வதை நான் கேட்டே ஆக வேண்டும்..

ஆனாலும்

எனக்கு மூளையும் இருப்பதாலும், அதில் சொந்த சிந்தனையும் இருப்பதாலும், என்னை வழிநடத்த எனக்கென்று கொள்கையும் இருப்பதாலும், 

அக் கொள்கையே என்னை வழி நடத்தும்...

சொல்லற்க, சொல்லில் நீதியிலாச் சொல்